Үнсний орцыг хоёр дахин нэмэгдүүлж, бетоны нүүрстөрөгчийг 20% бууруулжээ

Их Британийн Environment Agency-ийн туршилтаар бетон дахь нүүрсний дэгдэмхий үнсний орцыг 14%-аас 30% болгон нэмэгдүүлэхэд нүүрстөрөгчийн ул мөрийг 20%-иар бууруулж, бат бэхийн шаардлагыг хэвээр хангаж чаджээ.

Туршилтыг Environment Agency, RPC Contracts болон Material Evolution хамтран хийсэн бөгөөд усны байгууламжид ашигладаг угсармал бетон блокийн найрлагыг шинэчилсэн байна. Ингэхдээ Material Evolution-ийн MevoXL нэмэлтийг ашиглаж, цементийг орлох дэгдэмхий үнсний хэмжээг хоёр дахин гаруй нэмэгдүүлжээ.

Шинэ найрлагын бат бэхийн үзүүлэлт 78 N хүрсэн нь техникийн шаардлага болох 50 N-ээс 56%-иар өндөр үзүүлэлт юм. Үүний зэрэгцээ бетон үйлдвэрлэх материалын өртөг өсөөгүй байна.

Дэгдэмхий үнс зэрэг нэмэлт цементлэг материалыг их хэмжээгээр ашиглахад бетоны эрт үеийн бат бэх буурах эрсдэл байдаг. Харин энэхүү туршилт нь зөв найрлага, нэмэлтийн технологи ашигласнаар цементийн хэрэглээ болон нүүрстөрөгчийн ялгарлыг бууруулахдаа бат бэх, өртгийг алдагдуулахгүй байх боломжтойг харууллаа.

Энэ нь цемент, бетон үйлдвэрлэгчдийн хувьд үйлдвэрлэлийн нүүрстөрөгчийг бууруулах нэг боломжит чиглэл болж байна.

Эх сурвалж: World Cement