Petro Matad-ийн өдрийн дундаж олборлолт 233 баррельд хүрчээ
Petro Matad компанийн Матад XX талбайн газрын тосны өдрийн дундаж олборлолт 2026 оны эхнээс 233 баррельд хүрсэн байна. Энэ нь 2025 оны өдрийн дундаж 168 баррельтэй харьцуулахад 38.7 хувиар өссөн үзүүлэлт юм.
Тус талбайд Heron-1 болон Gazelle-1 гэсэн хоёр цооногоос олборлолт явуулж байна. Компанийн мэдээлснээр 2026 оны дөрөвдүгээр сард үйлдвэрлэл эхэлснээс хойших хуримтлагдсан олборлолт 100 мянган баррелийн босгыг давжээ.
Petro Matad-ийн олборлосон тосыг хөрш талбай дахь PetroChina компанийн байгууламжаар дамжуулан хадгалж, боловсруулан БНХАУ руу экспортолдог. 2025 онд компанид ногдох газрын тосны борлуулалтын орлого ойролцоогоор хоёр сая ам.доллар, нэг баррелийн дундаж борлуулалтын үнэ 61.8 ам.доллар байсан байна.
Гэхдээ дотоодын газрын тосны олборлолт нэмэгдсэн нь шатахууны үнэ болон нийлүүлэлтэд шууд нөлөөлөхгүй. Монгол Улс олборлосон түүхий тосоо экспортолж, бензин, дизель түлш зэрэг боловсруулсан бүтээгдэхүүнийг импортоор авдаг хэвээр байна.
Матад XX талбайн олборлолт нэмэгдсэн нь газрын тосны салбарт гарсан ахиц боловч дотоодын боловсруулах үйлдвэртэй холбогдсон тохиолдолд эдийн засгийн үр өгөөж нь илүү нэмэгдэх боломжтой.
