⚡ Эрчим хүчний салбарынхан 6-р сарын 30-наас ажил хаялт зарлахаар боллоо
Монголын Эрчим хүч, геологи, уул уурхайн үйлдвэрчний эвлэлийн холбооноос эрчим хүчний салбарын хэмжээнд 2026 оны зургаадугаар сарын 30-ны өдрийн 08:00 цагаас ажил хаялт зохион байгуулахаар шийдвэрлэснээ мэдээллээ.
Тус холбооны мэдээлснээр ажил хаялтын шийдвэр нь 2026–2027 оны хамтын хэлэлцээрийн хүрээнд цалин хөлс, хөдөлмөрийн нөхцөлтэй холбоотой асуудлаар талууд зөвшилцөлд хүрээгүйтэй холбоотой аж. Үйлдвэрчний эвлэлийн зүгээс энэ оны нэгдүгээр сараас эхлэн хэлэлцээр өрнүүлж, дөрөвдүгээр сард жагсаал зохион байгуулан Засгийн газар болон Эрчим хүчний яаманд шаардлага хүргүүлсэн ч өнөөдрийг хүртэл бодит шийдвэр гараагүй гэж мэдэгджээ.
Эрчим хүчний салбарын нийт 35 байгууллагын 9,317 ажилтнаас 28 байгууллагын 6,600 гаруй ажилтан ажил хаялтын санал асуулгад оролцож, 94.9 хувь нь ажил хаялтыг дэмжсэн байна. Үүний үндсэн дээр хуульд заасан журмын дагуу ажил хаялт зохион байгуулах шийдвэр гаргасан гэж үйлдвэрчний эвлэл мэдээлэв.
Харин үйлдвэрчний эвлэлийн төлөөллүүдийн онцолсноор эрчим хүчний салбар нь хүний амь нас, эрүүл мэнд, аюулгүй байдалтай холбоотой онцгой салбар тул ажил хаялт эхэлсэн ч цахилгаан, дулааны зайлшгүй үйлчилгээг тасалдуулахгүй байх дотоод зохицуулалтыг хийхээр төлөвлөжээ.
Одоогоор талуудын хэлэлцээ үргэлжилж байгаа бөгөөд ажил хаялт бодитоор хэрэгжих эсэх нь ирэх өдрүүдэд гарах хэлэлцээний үр дүнгээс шалтгаалах төлөвтэй байна.
