Өмнөд Солонгос ногоон үйлдвэрлэлд 745 тэрбум ам.долларын хөрөнгө оруулалт хийхээр төлөвлөжээ
Өмнөд Солонгосын Засгийн газар 2035 он хүртэл аж үйлдвэрийн нүүрстөрөгчийн ялгарлыг бууруулах, шинэ технологийг хөгжүүлэхэд нийт 1,000 их наяд вон буюу ойролцоогоор 745 тэрбум ам.долларын санхүүжилт чиглүүлэхээр төлөвлөсөн.
Аравдугаар сарын 7-нд танилцуулсан K-GX (Korea-Green Transformation) стратегийн хүрээнд ган, цемент, нефть боловсруулах, нефть-хими, хагас дамжуулагчийн үйлдвэрлэлийг бага нүүрстөрөгч ялгаруулдаг технологид шилжүүлэхээр зорьж байна.
Тухайлбал, гангийн үйлдвэрлэлд устөрөгч ашиглах технологийг хөгжүүлж, цементийн салбарт нүүрстөрөгчийн ялгарал багатай холимог цементийн эзлэх хувийг одоогийн 16 хувиас 2035 он гэхэд 40 хувьд хүргэхээр төлөвлөжээ.
Нийт санхүүжилтийн 200 их наяд воныг төсвийн эх үүсвэрээс, 790 гаруй их наяд воныг бодлогын санхүүжилтээр бүрдүүлэх бөгөөд хувийн хэвшил нэмэлтээр 220 их наяд воны хөрөнгө оруулалтын төсөл хэрэгжүүлэхээр зарласан.
Өмнөд Солонгос ийнхүү нүүрстөрөгчийн ялгарлыг бууруулах зорилтоо үйлдвэрлэлийн шинэчлэл, олон улсын зах зээл дэх өрсөлдөх чадвартайгаа уялдуулж байна.
