Гашуунсухайт–Ганцмодын төмөр замын гүйцэтгэл 57.67 хувьд хүрлээ
Гашуунсухайт–Ганцмод боомтыг холбох 19.5 км хил дамнасан төмөр замын барилга угсралтын ажил есдүгээр сарын 27-ны байдлаар 57.67 хувийн гүйцэтгэлтэй үргэлжилж байна. Төслийн Монголын хэсэгт 8.7 км өргөн цариг, 10.8 км нарийн царигийн төмөр зам болон 9.4 км гүүр барихаар төлөвлөжээ.
Энэ сард төмөр замын дээд бүтцийн угсралт эхэлж, нарийн царигийн 2.5 км зам, таван суман шилжүүлэг угсран, гурван байршилд 2,304 төмөр бетон дэр байршуулсан. Урт гүүрийн хэсэгт 2,382 шон суурь, 291 завсрын тулгуур, 666 дам нуруу үйлдвэрлэхээс 426 дам нурууг угсарсан гэж есдүгээр сарын 14-нд мэдээлсэн. Тухайн үед нийт гүйцэтгэл 54.15 хувь байсан бол хоёр долоо хоногийн дараа 57.67 хувьд хүрчээ.
Төслийн нэг онцлог нь Монголын төмөр замын сүлжээнд анх удаа өргөн болон нарийн царигийн төмөр зам хоёр түвшинд огтлолцох байгууламж баригдаж байгаа явдал. Ингэснээр хоёр өөр царигийн галт тэрэг бие биенийхээ хөдөлгөөнийг хаахгүйгээр зөрөх инженерийн шийдэл бүрдэхээр төлөвлөжээ.
Гашуунсухайт–Ганцмод нь зөвхөн төмөр замын төсөл биш. Гүүр, төмөр бетон хийц, далан, замын суурь, боомтын дэд бүтэц зэрэг томоохон барилга угсралтын ажлууд нэг дор хэрэгжиж байгаа учраас барилгын материалын салбарт ч шууд хамаарах бүтээн байгуулалт юм.
Эх сурвалж: МҮОНРТ
