2027 онд ₮12.5 их наядын хөрөнгө оруулалтын төсөл хэрэгжинэ
2027 онд улс, орон нутгийн төсөв, гадаад эх үүсвэр, төр-хувийн хэвшлийн түншлэл болон хувийн хөрөнгө оруулалтыг хослуулан 12.5 их наяд төгрөгийн хөрөнгө оруулалтын төсөл хэрэгжүүлэхээр Засгийн газар төлөвлөжээ. Эрчим хүчний шинэ эх үүсвэр, дамжуулах сүлжээ, орон нутгийн дулаан хангамж, авто болон төмөр зам, хилийн боомтын төслүүд хөрөнгө оруулалтын үндсэн чиглэлд багтсан.
Энэ 12.5 их наяд төгрөг бүхэлдээ улсын төсвөөс гарахгүй. УИХ-д өргөн мэдүүлсэн 2027 оны төсвийн төсөлд улсын төсвийн хөрөнгөөр санхүүжих хөрөнгө оруулалтын төсөл, арга хэмжээ, барилга байгууламжид 5.77 их наяд төгрөг тусгасан байна. Үлдэх хөрөнгө оруулалтыг орон нутгийн төсөв, гадаад эх үүсвэр, ТХХТ болон хувийн хөрөнгөөр бүрдүүлэхээр тооцжээ.
Засгийн газарт 2027 онд шинээр хэрэгжүүлэх 9.5 их наяд төгрөгийн төслийн санал ирсэн ч улсын төсвийн боломжийг 3.6 их наяд төгрөгөөр тооцож, шинэ төслүүдээс илүү ашиглалтад ороход ойр болон үргэлжилж буй бүтээн байгуулалтыг түрүүлж санхүүжүүлэх чиглэл танилцуулсан. Төсвийн төсөл УИХ-ын хэлэлцүүлэгт байгаа тул эцсийн дүн батлагдах явцад өөрчлөгдөх боломжтой.
Барилга, дэд бүтцийн салбарын хувьд 2027 оны хөрөнгө оруулалтын хэмжээ нь цемент, бетон, арматур, барилгын машин механизм болон тээвэр, логистикийн эрэлтэд нөлөөлөх томоохон хүчин зүйл болно. Яг ямар төслүүд хэдий хэмжээний санхүүжилт авч, хэд нь бодитоор барилгын шатанд орох нь дараагийн гол үзүүлэлт болно.
Эх сурвалж: Монгол Улсын Засгийн газар
